05. Januar 2019
Auswahl
Ansicht
Sonstiges
 
 

So, leve Frünnen, de Löwen hebbt uns gottloff neet upfreten! Wi leven noch! Up uns Tour na Namutoni freien uns weer wilde Deren. Man wat is Namutoni? Dat is ‘n Bollwark ut Kaiserstieden in Dütskland, as Namibia uns Kolonie weer. Uns Soldaten weren daar stationeert, avers neet willkomen, un wurren faktieds van Stammen angrepen. So hebbt se ’n Fort boot un daar Schuul söcht. In de Bollwark steiht ’n Toorn un de bestiegen wi nu. Van boven sehn wi heel wunnerbaar Biller van de Etosha-Park. Daar kannst so rechtschapen de Utmaten sehn van de Kuntrei, nahbi un wiedweg, un Deren bewunnern.

Denn jökeln wi noch ’nmaal dör de Park un kriegen dit un dat van uns Frünnen, de Deren, in d’ Luur. Unner annern Kappgeier, Kudus, Nettgiraffen, Koko-Vögels, Gnus, Blootsnabelwevers (Vögels). Denn kummt wat Besünners. Unner ’n Boom liggt ’n Löwenmanntje un stuuv up hüm an marskeert ’n Elefantenkoppel. Wat sall dat geven? De Löw treckt de Steert in un geiht fleuten. De hebbt Nood, wenn Elefanten dichtbi bilangs komen. Up ’n annern Stee sehn wi, dat ’n Elefantenkoh ’n Löw in de Flüggt jaggt . Un nu is dat mit de Herelkheid in de Derenwereld vöreerst vörbi. Nu wacht heel wat anners up uns .

Wi besöken ’n San-Dörp. San is ’n Stamm, dat bünd Buskmannen. As Nomaden bünd de jahrut jahrin mit hör Kojen, Zegen un Schapen herümtrucken, immer achter dat Foor an. Denn hett man hör dat Weidland as Schuulkuntrei för wilde Deren ofnomen. Nu weren se sotoseggen sünner Daarwesen (Existenz). ’n Farmer verarvt sien heel Budel för ’n sozialen Inrichten. Daar is man up de Infall komen, to versöken, de Minsken daar to Stee un Stohl (seßhaft maken) to brengen. Dat is ‘n Versöök van ‘t Land Namibia un word van enigen sozialen Hülptsorganisationen ut Dütskland mit Geld unnerstütt .

De Mannlüü warken vörmiddags up de Farm un ’snamiddags bünd se an ’t Handwarken, meestendeels mit Holt. Dat, wat se snittjen doon, word van de Laden, de to de Bedriev hört, to faste Priesen ofnomen un an Touristen verköfft. Dat Geld steiht de Familljen to ’t Leven to Verfögen. Eten un Drank gifft umsünst van de Farm. De Kinner gahn na hör egen School. Dat Geld daarto is ut de Kölner Kuntrei upbrocht worden. Vördeem geev ’t daar kien School. All Kinner tohoop begröten uns mit ’n paar Leden .

Denn is ‘t Tied, mit de Froo, de ‘t Seggen d’r hett (Wedefroo van de Farmer) to proten. De Versöök löppt siet 1989. Of de San up Düürte daar Wuddels slaan, is noch neet herut. De Lüü hebbt nu avers Arbeid, hör Utkomen un bünd tofree.

Wenn ’n beten Geld over is, worden eenfach Husen sett, man de meesten Familljen bünd noch in armsalige, runn Katen (Hütten). In een so ’n Dingerees dröff ik herinkieken. De Froo stunn vör de Kaat un harr hör Baby an de Bost, un kunn ’n beten Engelsk verstahn. Oh, Kinner, wat ’n Armood! De Froo vertellt mi so ’n beten van hör Leven dagelik un waar bedrövt dat in hör Famillje togeiht, schoons se ja up de Farm inbunnen sünd. Well hier bi uns noch klaagt, de sall driest daarhen flegen, denn kann he dat Elend van anner Minsken sehn!

Un denn proot uns ’n jungen Froo in Dütsk an. Nanu! De kummt ut ’t Butjadingerland, weer daar up Visit west, harr ’n witten Afrikaner kennen lehrt un is so daar hangen bleven. Un nu will se geern mithelpen, de Kinner un de Olleren wat an Könen to vermiddeln. Wat is de Wereld doch lüttjet!

Nu avers geiht ’t up de Avend an un wi moten Ofscheed nehmen. Up de Umtour sehn wi ’n Bült Waartenswienen. Mörgen verlaten wi nu vör ’t eerste de wilde Deren un fahren mit uns Bus torügg na Windhoek un flegen denn wieder na Botswana un Simbabwe. Dat is nödig, wiel de Wiederfahrt an de Grenz van Angola, dör de Caprivi-Region, to gefahrelk is. Daar worden stadig Farmers dör Kommunisten umbrocht. Wi avers willen ja levend torügg! De Reis na de Hauptstadt brengt ok ’n Bült Indrücken för Jo un uns!

Emden vom Samstag, 5. Januar 2019, Seite 7 (7 Views)

ZURÜCK ZUR SEITE

 
 

<   Januar   >
Mo Di Mi Do Fr Sa So
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31