13. April 2019
Auswahl
Ansicht
Sonstiges
 
 

Wi bünd in Granada un de Alhambra liggt achter uns. Dat kann neet angahn, ’n paar Worden over twee Sünnerlikheiden, de dat daar noch gifft, ’n beten to vertellen. Dat bünd de Könenksgrafftsteden un de Kathedrale. Bi de eerst benömte bünd wi nu.

De stahn middenmanken de Medina (ollste Stadtdeel) un bünd verbunnen mit de Dom. De Boo is van 1504 of an entstahn. Dat is wall de bekennteste Boo as Grafftstee för Könenks, plaant van Enrique Egas. De Kapell is in vööl Versetten boot worden un daaran hebbt alltohoop teihn Boomester warkelt. Müürwark un Moimaken is Gotik, de Grafftstee is Renaissance un bito kummt de so benömte granadiske Künst ut 17. un 18. Jahrh. Daarin bünd een Hauptaltar un veer siedels. Dör veer Portalen kannst in de Dom komen .

Hier bünd begraven de Könenkskinner Johanna, de Wahnsinnige, un Philipp, de Moje. De Grafftsteden hett de Italiener Domenico Fancelli ut Carrara-Marmelsteen plaant. Wat de grote Antahl an Künstlers un Boomester daar upsett hebbt, dat is grootaardig un haut di haast ut de Pantuffels. Ik weet würrelk neet, waar anners man sowat bewunnern kann. Alleen dat Gadderwark daarför, wat ’n düürabel Mesterarbeid.

Na disse Prachtboo visenteren wi nu de Kathedrale, de man ok Wannerkathedrale nömt, wieldat se an dree verscheden Steden stahn hett. As de Moslems 1492 dör ’t Christendom oflöst worden bünd, wull man futt Gottshusen in christelke Aard hebben. Toeerst is in de Alhambra ’n Moschee umwannelt worden, denn wurr se verleggt in ’n nejen Kark, de 1495 in ’t Jödenvördel entstahn weer. 50 Jahr verlatert is man denn 1561 in de neje Kathedrale umtrucken, de daar avers noch neet klaar weer. De Grundsteen is 1523 leggt worden un Enrique Egas weer de Boomester. Karl de V. weer mit de Plaan in Gotik neet inverstahn, wieldat he in de Kathedrale sien lesde Rohstee hebben wull. So hett Siloe de Plaan ännert un ok de Kark. He is denn stürven un anner Architekten hebbt wieder boot, sodat 1704 dat Gottshuus vullkomen kumpleet weer. Dat man 181 Jahren lang warkelt hett un dat sovööl Boomesters bedeligt weren, is ’n Kathedrale tostann komen, de grootaardiger neet wesen kann.

Wenn du daar herin kummst, büst faszineert. De Altarruum, eenfach herelk, neet to beschrieven, de Tabernakel, sülvern, wunnerbaar. En Kapell tegen de anner, all prachtig utstaffeert. Overall Figüren van de Gottsmoder. Altäre siedels, en mojer as de anner. Un buten, de Gevels, van all Sieden herelk, un ok noch all verscheden. De Portale, priesherelk. De groten Örgels in dat Middelschipp, andonelk. Wi All bünd van disse Kark düchtig van andaan. In Worden kannst dat heel neet beschrieven, wat du daar vör de Ogen hest. Daar gifft heel kien Utdrücken to, de topaß för sowat komen.

Tegen Avend moten wi leidergotts disse herelke Stadt verlaten. Wi sehn noch de baldadige Bullkamparena. Denn geneten wi noch ’nmaal de Biller van de Alhambra boven. Uns fallt up, dat de oll Husen ’n Bült lüttje Balkone hebbt, de man avers neet nützen kann, so smaal bünd de. Uns word verklookfidelt, dat ’t man bloot Zieraat weer üm antogeven, dat man sowat betahlen kunn.

Nu geiht dat dör de Bargen up Malaga an. Unnerwegens sehn wi grote Heerden van Schapen un ok weer Sünnblömenfelden, vull an ’t bleihen. Up de Umtour gifft noch Verbliev in Malaga. Ik vertell anner Sönndag daarvan.

Emden vom Samstag, 13. April 2019, Seite 11 (6 Views)

ZURÜCK ZUR SEITE

 
 

<   April   >
Mo Di Mi Do Fr Sa So
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30